დაცული ტერიტორიების სააგენტომ ეროვნული პარკების კვირეული ეკოსაგანმანათლებლო პროექტით „ვიცავ ჩემი ქვეყნის ბუნებას“ რაჭაში, ამბროლაურისა და ონის მუნიციპალიტეტში დაიწყო.
პროექტის ფარგლებში, ორი დღის განმავლობაში, ამბროლაურისა და ონის მუნიციპალიტეტის სკოლის მოსწავლეებისთვის საინფორმაციო შეხვედრები და ტრენინგები გაიმართა თემაზე „საქართველოს დაცული ტერიტორიების ბიომრავალფეროვნება“ და „ადამიანის უფლებები გარემოსდაცვით სფეროში“. ტრენინგებს უძღვებოდა დაცული ტერიტორიების სააგენტოს დაგეგმვისა და განვითარების სამსახურის უფროსი, ბიოლოგიის დოქტორი ნატო სულთანიშვილი.
პროექტის ფარგლებში მოსწავლეებს აქვთ შესაძლებლობა მონაწილეობა მიიღონ კონკურსში და წარმოადგინონ ნამუშევრები თემაზე -„ვიცავ ჩემი ქვეყნის ბუნებას“ ესეს, ფოტო-სურათის ან ნახატის სახით. კონკურსში საუკეთესო ნამუშევრის ავტორები დასკვნით ღონისძიებაზე გამოვლინდებიან.
ეროვნული პარკების კვირეული ყოველწლიურად აღინიშნება მსოფლიოს სხვადასხვა ქვეყანაში აპრილის ბოლო კვირის განმავლობაში. კვირეულის ფარგლებში, დაცული ტერიტოროების სააგენტოს მიერ, კიდევ არაერთი აქტივობაა დაგეგმილი.
ეროვნული პარკების კვირეული დაცული ტერიტორიების სააგენტოს ინიციატივით მიმდინარეობს, გერმანიის მთავრობის (BMZ/ KfW) პროექტის "ბიომრავალფეროვნება და ადგილობრივი მდგრადი განვითარება საქართველოში" ფარგლებში, საკონსულტაციო კომპანია "გოპა"-ს და ეკოვიჟენის ტექნიკური მხარდაჭერით.