ჯეირნები ვაშლოვანის დაცულ ტერიტორიებზე 

გასულ კვირას, დაცული ტერიტორიების სააგენტოში მიმდინარე პროექტის „ჯეირნების რეინტროდუქცია კავკასიის ისტორიულ ჰაბიტატებში“ მეორე ეტაპი დასრულდა. პროექტის ფარგლებში აზერბაიჯანიდან საქართველოში რეინტროდუცირებული ჯეირნების ვაშლოვანის დაცულ ტერიტორიებზე გაშვების ღონისძიება ჩატარდა. აღნიშნული პროექტი აზერბაიჯანის ეკოლოგიისა და ბუნებრივი რესურსების სამინისტროსა და ბუნების მსოფლიო ფონდის (WWF) ინიციატივით, ასევე გერმანიის თანამშრომლობისა და ეკონომიკური განვითარების სამინისტრო (BMZ) ფინანსური მხარდაჭერით განხორციელდა.

აღსანიშნავია, რომ საუკუნეების მანძილზე ჯეირანების საცხოვრებელი არეალი სამხრეთ და სამხრეთ-აღმოსავლეთ საქართველოს ტერიტორიების საკმაოდ ვრცელ ფართობს მოიცავდა. მოგვიანებით კი, უკანონო ნადირობის და ადამიანების არაკეთილგონივრული საქციელის მიზეზით გასული საუკუნის 40-იან წლებში ეს სახეობა სრულიად განადგურდა.

მიმდინარე ეტაპზე აზრებაიჯანიდან საქართველში გადმოყვანილია ჯეირნების 10 ეგზემპლიარი, რომლებიც მონიტორინგის მიზნით სპეციალური სენსორული საყელოებით აღიჭურვნენ. ხოლო იმისდა მიხედვით, თუ როგორ მოხდება მათი ადაპტაცია ახალ გარემოში, იგეგმება დამატებით 150 ეგზემპლიარის შემოყვანა.

ვაშლოვანის დაცულ ტერიტორიებზე ჯეირნის ისტორიულ ჰაბიტატებში ჩასახლების პროექტი 2009 წლიდან ხორციელდება ამერიკის შეერთებული შტატების საერთაშორისო განვითარების სააგენტოს (USAID) და თურქეთის გარემოს დაცვის სამინისტროს ხელშეწყობით. თუმცა, გასულ წლებში თურქეთიდან შემოყვანილ ჯეირნების ნაწილი, ახალ გარემოში ადაპტაციასთან დაკავშირებული სირთულეების გამო დაიღუპა და დროთა განმავლობაში აღნიშნული პროექტის ხელახლად განხორციელების საჭიროება წარმოიშვა.