პროექტის, „იმერეთის მღვიმეების მართვის გაუმჯობესება“, ფარგლებში საქართველოს ჩეხ სპელეოლოგთა ჯგუფი ესტუმრა. ვიზიტის მიზანს მღვიმეების მიკროკლიმატის მონიტორინგი და საწურბლიას მღვიმის სპელეოთერაპიული მიზნებისთვის შეფასება წარმოადგენს. 

ჩეხი ექსპერტები - კარელ დრბალი, ვრატისლავ ოურაბკა და პეტრ ზაიჩეკი დაცული ტერიტორიების სააგენტოს თავმჯდომარე ლაშა მოისწრაფიშვილსა და იმერეთის მღვიმეების დაცული ტერიტორიების დირექტორ ზაალ კვანტალიანს შეხვდნენ. ასევე, მოინახულეს პრომეთეს, სათაფლიას, საწურბლიასა და დათვის მღვიმეები სადაც, მონიტორინგის პროგრამის მიმდინარეობისას მღვიმეების კვლევითი აპარატურა - ტენიანობისა და ტემპერატურის საზომი მოწყობილობა დამონტაჟდა, დაცული ტერიტორიების ადმინისტრაცია კი მღვიმის მიკროკლიმატის შემადგენლობის შემსწავლელი მოწყობილობით აღიჭურვა. განხორციელდა დამონტაჟებული აპარატურიდან ინფორმაციის ამოღება, ამასთან იმერეთის მღვიმეების დაცული ტერიტორიების ადმინისტრაციის თანამშრომლებს ჩაუტარდათ ტრენინგი აპარატურის ექსპლუატაციისა და მონაცემების დამუშავების თემაზე. აღსანიშნავია, რომ ჩეხეთის მღვიმეების სამსახურის მიერ პერსნალური კომპიუტერი გადაეცა იმერეთის მღვიმეების დაცული ტერიტორიების ადმინისტრაციას, სადაც, თავს მოიყრის მღვიმეების კვლევის შედეგები. 

ექსპერტები, ახლადაღმოჩენილი მღვიმეების შესასწავლად, რაჭას ესტუმრნენ და ადგილზევე განახორციელეს მღვიმის აგეგმვა და მიკრო კლიმატის შეწავლა. აგრეთვე დაათვალიერეს მარტვილის ტერიტორიაზე არსებული მღვიმეებიც. ექსპერტების სამუშაო ვიზიტი 3 ნოემბრამდე გასტანს.

აღნიშნული პროექტი ჩეხეთის მღვიმეების სამსახურის მხარდაჭერითა და ჩეხეთის განვითარების სააგენტოს დაფინანსებით ხორციელდება.

მიმაგრებული ფაილები