/ 50 კმ, 3 (სამი) დღე, საცხენოსნო, რთული /

მთავარი ღირსშესანიშნაობები: გომეწრის ხეობის ძველი სოფლები, განსაკუთრებით დოჭუს არქიტექტურა. უნიკალური წმინდა არყნარი კორომები, სადაც წამყვანი სახეობაა წითელი წიგნის სახეობა რადეს არყი. ასევე დეკიანი კომპლექსები, სადაც შესაძლებელია დაკვირვება კავკასიის ენდემზე კავკასიურ როჭოზე. ბორბალოს მთა და მისი მიმდებარე ტერიტორია რომელიც ჯიხვის გავრცელების არეალია.

მარშრუტი იწყება ადმინისტრაციული შენობიდან ქუესა და მირგველას გავლით გრძელდება გომეწრის ხეობაში, სადაც შესაძლებელია უძველესი სოფლების მონახულება. მათ შორის აღსანიშნავია დოჭუ, რომელიც თუშური ტრადიციული არქიტექტურის ნიმუშს წარმოადგენს. ჯვარბოსელისა და კოკლათის გავლით მარშრუტი გრძელდება ალაზნისთავის მიმართულებით. შესაძლებელია მტაცებელი ცხოველებიდან შეხვდნენ მურა დათვს. ალაზნისთავის შემდეგ მარშრუტი გრძელდება ბორბალოს მიმართულებით, სადაც შესაძლებელია კავკასიის ენდემზე, აღმოსავლეთკავკასიურ ჯიხვზე დაკვირვება. ბორბალო წარმოადგენს თუშეთის დაცული ტერიტორიის საზღვრის უკიდურეს დასავლეთ ნაწილს, საიდანაც ბილიკი გრძელდება ფშავ-ხევსურეთის მიმართულებით.

მარშრუტზე სასმელი წყალი ხელმისაწვდომია თავიდან ბოლომდის, თუმცა რეკომენდირებულია მცირე მარაგის ტარება.

მარშრუტზე გავლის სავარაუდო განრიგი:

დღე I: სოფელი ომალო - ჯვარბოსელი  (22,5 კმ) ღამისთევა შესაძლებელია საოჯახო სასტუმროებში. სოფლის სიახლოვეს ასევე შეგიძლიათ გაშალოთ კარავი.

დღე  II: სოფელი ჯვარბოსელი - ალაზნისთავი (20 კმ.) ღამისთევა კარავში.

დღე III: ალაზნისთავი - ბორბალო    (7,5)  ღამისთევა კარავში.